【一分錢一分貨啦親】又一城Sweet-O-logy

Share the post

本身中女係諗住去又一城食supersandwich既….點知去到先知裝緊潢,所以就諗住搵過第二間餐廳食。原本諗住去Ciao Chow,不過見咁多人排隊,所以去左對面果間Sweet-O-logy。

餐廳裝潢得不錯,全店白色,有點高貴的感覺,門口還放置了一個甜品櫃,感覺有點高檔。細看menu下發現價錢便宜,不能想像又一城的餐廳會有$59一碟意粉!加上沒人排隊的情況下,就選擇了這間。

企左係門口成分鐘都冇人招呼我地,我見d侍應望到我地但冇理我地,令我要行到入去餐廳叫兩位先有人用對眼苗一苗,我唔知佢係咪示意我果到有位呀,於是我行去裝下,又唔見有位,果個苗一苗我唔知佢係咪想同我講人地啱啱埋單走?

跟住坐低左,都係冇人抺枱同拎餐牌,如果好忙又見到佢地捧餐果d係冇問題可以諒解既,但實際上又唔係,又冇服務員行出黎,唔知呢埋左去邊….之後見到有個睇落返工返得唔係咁開心既男侍應,佢斜啤左我地張枱一下就行過左(汗)

幾經辛苦我地order左一個意粉同all day breakfast,想講d薯條好似攤到凍晒果d淋,而d意粉比起上次上水果間好食少少,但唔夠味。佢隨餐會送熱/凍柚子蜜,如果凍檸茶奶茶果D就要加$8。杯柚子蜜好似柚子茶咁,唔係好凍,D冰溶晒,不過算啦,我都唔想飲太凍。本來想食完飯order個甜品試下,點知search到網上有人話甜品有伏!好彩睇一睇啫。

最後我只能說一分錢一分貨,都知又一城無端端有間咁平既餐廳又冇人排隊應該要留意一下。餐廳服務態度欠佳,食物都係得個靚字,好睇唔好食,聽聞開左業成兩年,希望佢地會改善一下啦….!

環境★★★★☆
食物質素★★☆☆☆
服務★★☆☆☆
抵食度★★★★☆
整體★★☆☆☆

Sweet-O-logy
九龍塘達之路80號又一城UG層UG22號舖

 


Share the post

1 Comment

發表迴響